نئی دہلی: جمعہ کی صبح دہلی کے تلک نگر علاقے کے ایک سرکاری اسکول کے قریب ایک سوئس خاتون کی لاش ملی جس کا آدھا حصہ سیاہ پلاسٹک کے تھیلے سے ڈھکا ہوا تھا۔ متوفی کی شناخت لینا برجر کے نام سے ہوئی ہے جو سوئٹزرلینڈ سے تعلق رکھتی ہیں۔ پولیس نے اس معاملے میں گرپریت سنگھ نامی ایک شخص کو گرفتار کر لیا ہے۔
پولیس ذرائع کے مطابق ملزم کی ملاقات خاتون سے سوئٹزرلینڈ میں ہوئی جس کے بعد دونوں میں دوستی ہوگئی۔
پولیس نے بتایا کہ گرپریت، جو اکثر سوئٹزرلینڈ میں برجر سے ملنے جاتا تھا، اسے شک تھا کہ اس کے کسی دوسرے آدمی کے ساتھ تعلقات ہیں۔ جس کی وجہ سے گرپریت نے برجر کو قتل کرنے کا منصوبہ بنایا اور اسے ہندوستان آنے کو کہا۔ گرپریت کے کہنے پر برجر 11 اکتوبر کو ہندوستان پہنچی۔
پانچ دن بعد، گرپریت متاثرہ کو ایک کمرے میں لے گیا، اس کے ہاتھ اور ٹانگیں باندھ کر اسے قتل کر دیا۔ ابتدائی طور پر، اس نے برجر کی لاش کو ایک گاڑی میں رکھا جو اس نے ایک خاتون کی شناخت سے خریدی تھی۔ تاہم جب گاڑی سے بدبو آنے لگی تو اس نے اس کی لاش سڑک پر پھینک دی اور موقع سے فرار ہوگیا۔
دہلی پولیس نے مبینہ طور پر سی سی ٹی وی فوٹیج کی مدد سے گاڑی کا رجسٹریشن نمبر حاصل کرنے کے بعد گرپریت کا سراغ لگایا۔ انہوں نے وہ کار جس میں لاش رکھی تھی اور ایک اور فور وہیلر جو گرپریت کا تھا ضبط کر لیا۔
