بیدر۔24/مارچ۔ کانگریس کے ریاستی صدر ڈی کے شیوکمار نے الزام لگایا کہ بی جے پی اپوزیشن کو زبردستی دبا رہی ہے کیونکہ اسے آئندہ عام انتخابات میں شکست کا خدشہ ہے۔کے پی سی سی دفتر میں چیف منسٹر سدارامیا اور اے آئی سی سی جنرل سکریٹری رندیپ سرجے والا کے ساتھ مشترکہ پریس کانفرنس میں شیوکمار نے کہا کہ بی جے پی موجودہ وزرائے اعلیٰ کو گرفتار کر رہی ہے۔ وہ اپوزیشن جماعتوں کے کھاتوں کو ضبط کر رہی ہے اور گورنروں کا غلط استعمال کر رہی ہے۔ انہیں آئندہ انتخابات میں شکست کا خوف ہے۔انہوں نے کہا کہ ہم جمہوری ماحول میں کام کر رہے ہیں۔ ہم نے 78 لاکھ لوگوں کو کانگریس پارٹی میں شامل کیا۔ ہم نے پارٹی کارکنوں سے تقریباً 90 کروڑ روپے جمع کئے۔ ہم نے اسمبلی انتخابات کے دوران ایم ایل اے ٹکٹ کے دعویداروں میں سے ہر ایک سے 2 لاکھ روپے جمعکیے، جس کی رقم 20 کروڑ روپے تھی۔ بی جے پی نے وہ ساری رقم ضبط کر لی ہے۔انہوں نے الزام لگایا کہ حکمراں بی جے پی نے انکم ٹیکس کی خلاف ورزیوں کے بہانے تقریباً 290 کروڑ روپے ضبط کئے۔ ہماری پارٹی میں انتخابی بانڈ کا حصہ صرف 11 فیصد ہے، جب کہ بی جے پی کا حصہ 57 فیصد ہے۔ جب ہم پارٹی ملازمین کو تنخواہ دینے کے لیے جدوجہد کر رہے ہیں، بی جے پی نے آئی ٹی کی خلاف ورزی کے بہانے بینک کھاتوں میں 290 کروڑ روپے ضبط کر لیے۔ پارٹی الیکشن کے لیے اشتہارات دینے کے قابل نہیں۔ ہمیں عدالت سے بھی ریلیف نہیں مل رہا۔ میں نے گزشتہ 40 سالوں میں سیاست کو اس سطح پر نہیں دیکھا۔ بی جے پی صرف اپنے آپ کو شکست سے بچانے کے لیے اپوزیشن کے خلاف فریب اور طاقت کا استعمال کر رہی ہے۔شیوکمار نے کہا کہ پارٹی بی جے پی کے مظالم کی مذمت کرتی ہے۔ انہوں نے کہا کہ بی جے پی نے 2004 میں انڈیا شائننگ مہم شروع کی تھی، لیکن کانگریس نے انتخابات میں کامیابی حاصل کی۔ بی جے پی کو خدشہ ہے کہ وہ یہ الیکشن بھی اسی طرح ہار جائے گی۔ کانگریس پارٹی بی جے پی کی من مانی کی مذمت کرتی ہے۔ وزیر اعظم مودی ہماری گارنٹی اسکیموں پر الزام لگا رہے تھے۔ اب انہوں نے ہماری گارنٹی سکیمیں چوری کر لی ہیں اور اس کی تشہیر کر رہے ہیں۔ لوگ ہمارے کام سے واقف ہیں اور ہمیں یقین ہے کہ وہ ہمارا ساتھ دیں گے۔
لوک سبھا انتخابات میں شکست کے خوف سے بی جے پی اپوزیشن کے خلاف سازش کر رہی ہے۔ڈی کے شیوکمار




