بیدر کی تازہ ترین خبریں

جماعت ششم کے داخلہ امتحان کے لیے ہدایات جاری

بیدر۔11/مئی۔محکمہ سماجی بہبود کی جانب سے سال2026-27 کے لیے خصوصی اسکول منصوبے کے تحت درج فہرست ذات کے ذہین طلبہ کے انتخاب کے لیے اہلیت امتحان کے سلسلے میں آن لائن رجسٹریشن اور انتخابی عمل کی ہدایت جاری کر دی گئی ہے۔جاری کردہ اعلامیہ کے مطابق آن لائن داخلہ امتحان کے لیے جن طلبہ نے درخواستیں جمع کرائی ہیں، انہیں ہدایت دی گئی ہے کہ وہ 12 مئی 2026 کو صبح 11 بجے ودیارنیا ہائی اسکول، بیدر میں قائم امتحانی مرکز پر لازماً حاضر ہوں۔یہ اطلاع بیدر کے محکمہ سماجی بہبود کے نائب ڈائریکٹر کی جانب سے جاری کردہ پریس نوٹ میں دی گئی ہے۔

UGC-NEET اور KCETتربیتی پروگرام کے لیے رجسٹریشن کی اپیل

بیدر۔11/مئی۔کرناٹک اسٹیٹ اوپن یونیورسٹی کے”مسابقتی امتحانی تربیتی مرکز“کی جانب سے KCET اور UGC-NEET مسابقتی امتحانات کے لیے 45 روزہ تربیتی کیمپ کا افتتاحی پروگرام منعقد کیا جا رہا ہے۔اس موقع پر یہ تربیتی کیمپ 12 مئی 2026 کو صبح 11 بجے کرناٹک اسٹیٹ اوپن یونیورسٹی کے کیمپس میں واقع کاویری ہال میں شروع ہوگا۔ افتتاحی تقریب کی صدارت کرناٹک اسٹیٹ اوپن یونیورسٹی کے وائس چانسلر پروفیسر شَرَنَپّا وی حَلَسے کریں گے۔مہمان خصوصی کے طور پر بنگلورو نارتھ یونیورسٹی کے وائس چانسلر پروفیسر بی کے روی تقریب کا افتتاح کریں گے، جبکہ میشورو ایڈمنسٹریٹو ٹریننگ انسٹی ٹیوٹ کی جوائنٹ ڈائریکٹر اور سینئر کے اے ایس افسر سَتّیَ شْری آر شرکاء سے خصوصی خطاب کریں گی۔اس پروگرام میں رجسٹرار پروفیسر ایس کے نوین کمار، امتحانات کے رجسٹرار ڈاکٹر سی ایس آنند کمار، تعلیمی ڈین پروفیسر ایم رمناٹھم نائیڈو، اسٹڈی سینٹر ڈین ڈاکٹر این آر چندری گوڑا اور مالیاتی افسر ڈاکٹر ایس نرنجن راج بھی شریک ہوں گے۔کرناٹک اسٹیٹ اوپن یونیورسٹی کے علاقائی ڈائریکٹر نے اپنے بیان میں کہا ہے کہ خواہش مند امیدوار 12 مئی 2026 تک اپنا نام درج کرا سکتے ہیں۔ مزید معلومات اور رجسٹریشن کے لیے 2515944 0821اور 9964760090 پر رابطہ کیا جا سکتا ہے۔

ڈاک لائف انشورنس ایجنٹس کی بھرتی کے لیے براہِ راست انٹرویو 19 مئی کو

بیدر۔11/مئی۔بیدر ڈیوژن کے پوسٹل سپرنٹنڈنٹ کی جانب سے ڈاک لائف انشورنس اور دیہی ڈاک لائف انشورنس مصنوعات کی فروخت کے لیے براہِ راست ایجنٹس کے انتخاب کا اعلان کیا گیا ہے۔ اس سلسلے میں امیدواروں کو انٹرویو کے ذریعے منتخب کیا جائے گا۔اعلامیہ کے مطابق خواہشمند افراد کو ہدایت دی گئی ہے کہ وہ اپنی تازہ ترین پاسپورٹ سائز تصویر، ذاتی تفصیلات اور تعلیمی اسناد کی نقول کے ساتھ 19 مئی 2026 کو صبح 11 بجے پوسٹل سپرنٹنڈنٹ آفس، بیدر میں منعقد ہونے والے انٹرویو میں لازمی طور پر شریک ہوں۔اہلیت کے مطابق امیدوار کا کم از کم دسویں جماعت پاس ہونا اور عمر 18 سال یا اس سے زیادہ ہونا ضروری ہے۔ بے روزگار نوجوان، خود روزگار افراد، انشورنس کمپنیوں کے سابق ایجنٹس و مشیران، سابق فوجی اہلکار، آنگن واڑی کارکنان، خواتین تنظیموں سے وابستہ افراد، ریٹائرڈ گرام پنچایت اراکین اور دیگر موزوں امیدوار بھی درخواست دے سکتے ہیں۔بھرتی ہونے والے امیدواروں کو 5000 روپے بطور سیکیورٹی ڈپازٹ قومی بچت سرٹیفکیٹ یا کسان وِکاس پتر کی صورت میں جمع کرانا ہوگا۔ منتخب ایجنٹس کو ان کی کارکردگی کے مطابق کمیشن دیا جائے گا، جبکہ کوئی مستقل تنخواہ مقرر نہیں ہوگی۔ امیدوار کسی بھی دیگر انشورنس کمپنی یا ادارے کے ایجنٹ نہیں ہونے چاہئیں۔ مؤثر ابلاغی صلاحیت اور انشورنس سیلز کے تجربے رکھنے والوں کو ترجیح دی جائے گی۔مزید معلومات کے لیے قریبی ڈاکخانے سے رابطہ کیا جا سکتا ہے۔ یہ اطلاعانڈیا پوسٹبیدر ڈیوژن کے پوسٹل سپرنٹنڈنٹ کی جانب سے جاری کی گئی ہے۔

رات کے وقت خون کے نمونوں کی جانچ کے ذریعے فائلریا مرض کی تشخیص کی مہم

بیدر۔11/مئی۔بیدر تعلقہ کے شِرْسی (A) گاؤں میں ہاتھی پاؤں (فیل پا) کے مرض کی بروقت تشخیص کے لیے رات کے وقت خون کے نمونوں کی مائیکروسکوپک جانچ کا خصوصی سروے کیا گیا۔ یہ سرگرمی قومی ویکٹر بورن امراض کنٹرول پروگرام کے تحت منعقد کی گئی۔یہ مہم ڈاکٹر دھیانیشور نیرگُڈے اور ڈاکٹر شنکرپا بومّا کی ہدایت پر 9 مئی 2026 کو بنیادی صحت مرکز بگدل کی جانب سے انجام دی گئی۔ اس دوران لیمفیٹک فائلریاسس کی روک تھام کے لیے خون کے نمونے جمع کیے گئے۔اس موقع پر ڈسٹرکٹ فائلریا کنٹرول یونٹ کے سپروائزر ویرشیٹی چناشیٹی نے بتایا کہ اس بیماری کے جراثیم مائیکروفائلریا دن کے وقت انسانی جسم کے گہرے حصوں میں غیر فعال رہتے ہیں جبکہ رات کے وقت خون میں فعال ہو جاتے ہیں، اسی لیے درست تشخیص کے لیے رات 10 بجے کے بعد خون کے نمونے لیے جاتے ہیں۔احتیاطی اقدامات کے حوالے سے ہیلتھ انسپکٹر محمد ہادی تبریز نے عوام کو مشورہ دیا کہ مچھر دانی کا استعمال کریں، گھروں کے اطراف پانی جمع نہ ہونے دیں اور مچھر کے کاٹنے سے بچاؤ کو یقینی بنائیں، کیونکہ یہ مرض مچھر کی مخصوص نسل کے ذریعے پھیلتا ہے۔اس مہم کے دوران ضلع مانیٹرنگ آفیسر ابوبکر کی نگرانی میں مختلف گھروں سے خون کے نمونے حاصل کیے گئے۔ محکمہ صحت کے مطابق اگر کسی شخص میں انفیکشن کی تصدیق ہوتی ہے تو اسے فوری طور پر مفت علاج فراہم کیا جائے گا۔اس موقع پر متعدد صحت کارکنان، کمیونٹی ہیلتھ آفیسرز اور آشا ورکرز بھی موجود تھے، جنہوں نے سروے اور آگاہی مہم میں حصہ لیا۔ یہ سرگرمی نیشنل سنٹر فور ویکٹر بورن ڈیساسس کنٹرول کے تحت ملک کو 2027 تک فائلریا سے پاک بنانے کے ہدف کا حصہ ہے۔

Latest Indian news

Popular Stories