منگلور۔24/اپریل۔کیرالہ کے کچھ اضلاع میں ایویئن فلو کے معاملات کے سامنے آنے کے پیش نظر، منگلورو سمیت کرناٹک کے سرحدی علاقوں کو ‘ہائی الرٹ’ پر رکھا گیا ہے۔ کرناٹک کے محکمہ انیمل ہسبنڈری کے افسران نے یہاں یہ جانکاری دی۔ انہوں نے کہا کہ فی الحال کوئی بھی قدم اٹھانے سے پہلے کیرالہ کی صورتحال پر نظر رکھی جارہی ہے۔ ”ہمارے کیرالہ کے ہم منصبوں نے ہمیں یقین دلایا ہے کہ الپپوزا ضلع میں ایویئن فلو کو قابو میں لایا گیا ہے،” حکام نے کہا تاہم، ٹرینوں اور ریلوے اسٹیشنوں میں پولٹری اور پولٹری مصنوعات کی لوڈنگ، بکنگ اور نقل و حمل ابھی زیر غور ہے۔کیرالہ سے منگلورو تک چکن لے جانے کے لیے نہ صرف ریلوے بلکہ روڈ ٹرانسپورٹ کی بھی نگرانی کی جا رہی ہے۔ کیرالہ سے منگلورو میں چکن کی ایک بڑی مقدار آتی ہے، اس لیے ایویئن فلو کے پیش نظر منگلورو نے کیرالہ میں مقیم سپلائرز سے چکن کی خریداری روک دی ہے۔ مارکیٹنگ آفیسر سدھاکر شیٹی نے کہا ”کیرالہ کے محکمہ حیوانات نے ریاست کے کچھ اضلاع میں ایویئن فلو سے بچاؤ کا مشورہ دیا ہے۔ ہم صورت حال پر گہری نظر رکھے ہوئے ہیں۔“اس کے باوجود، مارکیٹ میں ابھی تک سپلائی میں کوئی خاص اتار چڑھاؤ نہیں دیکھا گیا ہے کیونکہ اگلے چند دنوں کی طلب کو پورا کرنے کے لیے مقامی طور پر کافی اسٹاک موجود ہے۔ ساحلی علاقوں میں تہواروں کی وجہ سے چکن کی مانگ میں کچھ دنوں تک کمی آ سکتی ہے، جہاں بہت سے صارفین گوشت پر مبنی کھانا کھانے سے گریز کرتے ہیں۔
بہ شکریہ نو بھارت
