بنگلورو۔28/دسمبر۔کرناٹک، اتراکھنڈ اور دہلی ان تینوں ریاستوں میں بی جے پی کی سیاست میں ایک چیز مشترک ہے۔ تینوں ریاستوں میں جب بھی بی جے پی کی حکومت بنی ہے، تینوں وزرائے اعلیٰ کو تبدیل کیا گیا ہے۔ دہلی میں پہلی بار 1993 میں اسمبلی انتخابات ہوئے اور بی جے پی کی حکومت بنی۔ پھر مدن لال کھرانہ وزیر اعلیٰ بنے۔ بعد میں انہیں ہٹا کر صاحب سنگھ ورما کو وزیر اعلیٰ بنا دیا گیا اور 1998 کے انتخابات سے ٹھیک پہلے سشما سوراج وزیر اعلیٰ بنیں۔ اسی طرح اتراکھنڈ میں 2000 میں بی جے پی کی پہلی حکومت بنی، پھر دو سال میں دو وزیر اعلیٰ بنائے گئے۔ پہلے نتیا نند سوامی اور پھر بھگت سنگھ کوشیاری۔ 2007 میں جب دوسری بار بی جے پی کی حکومت بنی تو تین وزیر اعلیٰ بنائے گئے۔ پہلے بھون چندر کھنڈوری، پھر رمیش پوکھریال نشنک اور پھر کھنڈوری۔ 2017 میں جب تیسری بار حکومت بنی تو پہلے ترویندر سنگھ راوت وزیر اعلیٰ بنے، پھر تیرتھ سنگھ راوت اور پھر پشکر سنگھ دھامی۔کرناٹک میں بی جے پی کی پہلی حکومت 2008 کے اسمبلی انتخابات کے بعد بنی تھی اور بی ایس یدیورپا وزیر اعلیٰ بنے تھے۔ درمیان میں ڈی وی سدانند گوڑا کو ہٹا کر وزیر اعلیٰ بنایا گیا اور پھر جگدیش شیٹر کو ہٹا کر وزیر اعلیٰ بنے۔ بی جے پی کی دوسری حکومت 2018 میں قائم ہوئی اور بی ایس یدیورپا اکثریت ثابت نہیں کر سکے۔ لیکن اسی اسمبلی میں یدی یورپا کانگریس اور جے ڈی ایس کی حکومت گرانے کے بعد 2019 میں دوبارہ وزیر اعلیٰ بنے۔ دو سال بعد ان کی جگہ بسواراج بومائی کو وزیر اعلیٰ بنایا گیا ہے۔ لیکن ایسا لگتا ہے کہ کرناٹک کی تاریخ دوبارہ دہرائی جائے گی۔ بومائی کو ہٹانے کے چرچے شروع ہو گئے ہیں۔ کرناٹک میں مئی 2023 میں انتخابات ہونے ہیں اور مانا جا رہا ہے کہ اگلے سال پانچ ریاستوں کے انتخابات کے بعد ریاست میں تبدیلی آسکتی ہے۔ حالانکہ ابھی بی جے پی کی طرف سے تردید ہے لیکن مستقبل کس نے دیکھا ہے۔