بیدر۔6/مئی۔ضلع الیکشن آفیسر گویندریڈی نے پیر کو بی وی بی کالج بیدر میں مسٹرنگ سنٹر کا دورہ کیا اور معائنہ کیا اور صحافیوں کو بریفنگ دی۔تیز دھوپ کی وجہ سے ووٹرز پریشان نہ ہوں ہر پولنگ اسٹیشن میں سائبان اور ٹینٹ کا نظام اور مرد و خواتین کے لیے دو الگ الگ ویٹنگ رومز اور پینے کے پانی کا انتظام کیا گیا ہے۔
درجہ حرارت 40 سے 42 ڈگری سینٹی گریڈ ہو سکتا ہے اس لیے لوگ صبح و شام بڑی تعداد میں پولنگ بوتھ پر ووٹ ڈالنے آئیں۔بیدر لوک سبھا عام انتخابات کے لیے ووٹنگ 7مئی کو ہوگی۔بیدر لوک سبھا حلقہ کے ہر اسمبلی حلقہ سے دو ہزار لوگ پولنگ بوتھ پر جا رہے ہیں۔ہر پولنگ بوتھ میں چار پولنگ عملہ،ایک مائیکروآبزور،پولیس، ڈی درجہ ملازمین اور دیگر موجود ہوں گے۔
انہوں نے کہا کہ پولنگ اسٹیشن کے افسران اور عملے کو لے جانے کے لیے KSRTC کی کل 243 بسیں اور 250 کروزر کا انتظام کیا گیا ہے۔بیدر لوک سبھا حلقہ میں کل 1528 پولنگ بوتھ ہیں۔ اس میں 324 مائیکرو پولنگ بوتھ اور 48 خصوصی پولنگ بوتھ ہیں۔ 85 فیصد پولنگ بوتھ سی سی ٹی وی کیمروں سے لیس ہیں۔ووٹرز کی کل تعداد 1892962 ہے۔ انہوں نے کہا کہ انتخابی مقابلہ میں 18 امیدواروں اور ایک نوٹا سمیت کل 19 امیدوار ہوں گے۔
ضلع سپرنٹنڈنٹ آف پولیس چن بسونا ایس ایل نے کہا کہ بیدر لوک سبھا حلقہ انتخاب کے لیے سول پولیس کے ایس آر پی، نیم فوجی دستوں اور سیکٹر موبائل افسران کو منظم طریقے سے تمام علاقوں میں تعینات کیا گیا ہے تاکہ لوگ بغیر کسی خوف کے اپنا ووٹ ڈالیں اور انہوں نے کہا کہ ضلع میں پرامن اور منظم پولنگ کے لیے محکمہ پولیس کی جانب سے خاطر خواہ سیکورٹی کے انتظامات کیے گئے ہیں۔اس موقع پر بیدر تحصیلدار دلشاد مہات، انفارمیشن آفیسر جی. سریش سمیت الیکشن کے لیے تفویض کردہ دیگر افسران اور عملہ موجود تھے۔
